Aguest ei, entà jo, eth paisatge mès polit e mès trist deth mon. Ei eth madeish paisatge qu'eth dera plana anteriora, mès l'è tornat a diboishar entà hèr-vo'lo a veir com cau. Ei aciu qu'eth petit prince apareishec ena Terra, dempús desapareishec.
Guardatz damb atencion aguest paisatge entà éster segurs de reconeisher-lo, se bèth dia vatz tà Africa, entath desèrt. E, se vos arribe de passar per aquiu, vos ac prègui, non vos pressetz cap, demoratz un shinhau just dejós dera estela! S'alavetz un mainatge va cap a vosati, s'arrís, s'a es peus d'òr, se non respon quan se li demane, endonviaratz facilament qui ei. Alavetz sigatz amables. Non me deishetz pas tan trist: escriuetz-me de seguida tà dider-me qu'a tornat...