Esti ye, pa mi, el paisax más guapu y más murniu del mundu. Ye'l mesmu paisax de la otra plana, pero dibuxélu una vegada más pa enseñávoslu bien. Equi foi onde'l principín apaició na Tierra y d'onde coló.
Mirái peratentos esti paisax pa tar perseguros de reconocelu, si un dia viaxáis per Africa, nel ermu. Y si llegáis a pasar perellí, encamiéntovoslo: nun entainéis; aguardái un migayu, xusto debaxu la estrella. Si entós llega un neñu a vosotros, si ri, si tien les guedeyes roxes, si nun respuende cuando se-y entruga, sabréis quién ye. ¡Sei bonales, entós! Nun me dexéis tan murniu. Escribiime darreu, diciime que'l principín tornó...