El Principe Picinin

Questo el zé, par mi, el pì belo e el pì triste paesajo del mondo. El zé el steso paesajo de la pagina de prima, ma lo gò disegnà n'altra volta pa farvelo vedar ben. Zé qua che el principe picinin el zé comparso sora la Tera, e dopo sparìo. Vardé con atension sto paesajo pa essar sicuri di riconossarlo, si un dì ndarì in Africa, in tel deserto. E, se ve capitarà de passar par de là, ve prego, no sté ver pressa, speté giusto un atimeto soto la stela! Se un quel atimo là un putelo vegnarà da voaltri, se el ridarà, se el gavarà i caveji del colore de l'oro, se nol rispondarà co ghe faré de le domande, capirì suito chi che el zé. Elora sipié gentili! No sté lassarme qua cussita triste: scrivime suito pa dirme che el zé tornà...