De Letj Prens (frisio)

Det as för mi at smokst lunskap üüb a hiale welt, man uk det, wat mi am bedrüüwetsten maaget. Det as detsalew lunskap üüs det üüb at sidi tuföör, oober ik haa at noch ens moolet, am jam at rocht tu wisin. Det as diar, huar de letj prens üüb a Eerd apdaaget an weder ferswünjen as. Luke jam jam detdiar lunskap rocht uun, det jam seeker wees kön, det jam at wederkeen, wan jam een dai troch Afrika raise, troch a wüüste. An wan jam tufelig diar föörbikem, do bad ik jam, det jam ej gau widjerluup. Teew’em en sküür, jüst oner’t stäär! Wan ‘ar do en kint üüb jam tukomt, wan at lochet, wan at gulen hiar hee, wan at ej sworet, wan at fraaget wurt, do kön jam was riad, hoker at as. Do wees’em so gud an leet mi ej linger so bedrüüwet wees: skriiw’em mi gau, wan’er weder diar as …